نصائح للطلبة في اول سنة في الكلية – سنة أولي جامعة

نصائح لبداية مرحلة الجامعة

عندما تنتقل من مرحلة الثانوية إلي مرحلة التعليم الجامعي فقد تواجهك بعض العقبات وأحياناً الكثير من العقبات التي يجب أن تتخطاها بسلام حتي لا تيأس من الكلية ، عندما تنتقل الي الجامعة وفي أول سنة في الجامعة تكون خائف من تلك المرحلة ، والبعض يكون متحمس ، والبعض يشعر بالرهبة من الجامعة ونظام الجامعة والأشخاص الموجودين بها والدكاترة والمعيدين.

يشعر أن هناك حياة أخري غير الثانوية العامة والدروس والحصص لذلك سوف أقدم لكم بعض النصائح لسنة أولي جامعة تلك النصائح ناتجة من خبرتي أنا كطالب مر بخمسة سنوات في كلية هندسة إذا اتبعت تلك النصائح بإذن الله سوف تشعر أن الكلية والجامعة بيتك الثاني الذي تقضي بة وقت ممتع.

نصائح لسنة أولي جامعة

تلك النصائح سوف أقدمها للطلبة الذين سوف ينتقلون إلي الجامعة وسوف اسرد بها بعض المواقف التي حدثت معي حتي تتجنبوها والنصائح كالتالي.

١ – احمد الله علي الكلية

إنتهت الثانوية بمشاكلها وهمومها وحصلت علي مجموعك ربما قليل أو كثير قد تكون مظلوم في بعض الدرجات قد تكون حصلت علي حقك كل هذا غير مهم الأهم أن تحمد الله علي أن وفقك لتلك الكلية مهما كانت صغيرة فربما تلك الكلية الصغيرة تخرج رجل عظيم فالعظماء لا يتخرجون من كليات القمة فقط.

٢ – متدخلش كليه مش حاببها

ثاني نصيحة يجب أن تستفيد بها وهي إياك أن تدخل كلية لا تحبها ولا تحب مجال عملها مهما كان رأي أهلك ومهما كانت الظروف فهذا القرار ليس بسيط تلك الوظيفة سوف تعمل بها لباقي حياتك ليس من الشرط أن تدخل كلية قمة لترضي أهلك وأنت لا تحب مجال الطب أو الهندسة مثلاً لذلك إختار ما تحبة.

٣ –  اول اسبوع افهم الدنيا

الجزء ده أهم حاجة لازم تفهمها كويس وهيبقي فية نصايح كتير مهمة للطلبة في أول سنة في الكلية لان أول أسبوع في الكلية تشعر بتغير كبير خاصة إذا كنت طالب مغترب ولا تعرف أحد في الكلية لذلك النصائح في أول أسبوع كالتالي.

  • أول يوم في الكلية روح الكلية فاضي ممعكش غير بيان الترشيح للكلية وادخل المحاضرة (الفصل) إسمع كلام الدكاترة وإتعرف عليهم شوف النظام في الكلية عامل إزاي إتمشي في الكلية وإتفرج عليها.
  • صاحب شخص تحس إنة هيبقي مناسب ليك وهيساعدك في الكلية ومتدورش كتير علي الشخص ده أنت هتلاقيك بتروح لواحدك علي الشخص اللي زيك فمتقلقش من موضوع إنك تكون صحاب في الكلية.
  • أول ما الدكاترة تبدأ في الشرح وتدخل في المناهج لازم تبقي متأكد أنك مش هتبقي فاهم أي حاجة خالص لو حسيت إنك فاهم نص نص تبقي أنت عبقري.
  • من الحاجات اللي لازم تعملها إنك تاخد كشكول معاك أول ما يبدأ الدكاترة في شرح المنهج وتكتب وراء الدكتور كل معلومة ( حتي لو مش فاهم ) وفي الأغلب مش هتبقي فاهم لحد ما يجي دور السيكشن هشرحة بعدين.
  • متحكمش علي الكلية من أول أسبوع زيي وتقول صعبة ومش هعرف أمشي فيها ولازم أخش كلية تانية لا إصبر أول أسبوعين لحد ما تاخد علي جو الكلية بعد كده هتفهم إن النظام في الكلية ثابت.
  • أول سنة في الكلية أسهل سنة في المناهج وأصعب سنة هتعدي عليك في الكلية كلها غالباً مش هتبقي أحسن سنة ليك في الكلية عشان لسه مخدتش علي جو الكلية.

٤ – دور السيكشن

السيكشن حاجة زي المحاضرة بس علي صغير شوية بتبدأ من تاني أسبوع بيشرحلك فيها المعيد وبيحل معاك أمثلة غالباً السيكشن بتفهم فيه أكتر من المحاضرة عشان المعيد بيكرر كلام الدكتور وبيحل أمثلة.

٥ – تعرف علي شخص أكبر منك

يجب عليك أن تتعرف إلي أحد الطلبة الذين مروا بأول سنة في الكلية بسلام لكي يشرح لك نظام الدكاترة ويحذرك من الدكاترة الرخمين ويقولك إزاي تتعامل معاهم وايه الحاجات اللي لازم تعملها لو لقيت الشخص ده متشاؤم فكك منة الكلية والله الموضوع فيها بسيط بس في ناس بتحب تكبر المواضيع.

٦ – إبتعد عن المدبلرين

المدبلر في الكلية هو الساقط إبتعد عنة نهائياً لا بد أنك سوف تقابلة كما قابلتة أنا وهيقولك ان الكلية صعبة ورخمة وهتضيع حياتك علي الفاضي الشخص ده بيبقي سلبي إبعد عنة نهائياً .

٧ – ذاكر أول بأول

مش هقولك نظام الكلية زي الثانوي ولازم تذاكر أول بأول عشان متسقطش لا أنت ممكن متذاكرش طول السنة وتيجي في الآخر تلم المنهج وتنجح بس مش هتستفيد وهتطلع حافظ مش فاهم أي حاجة في المجال اللي بتدرس فية عشان كده مش هتخسر حاجة لو ذكرت كل يوم نص ساعه إقرأ بس المحاضرات اللي أخدتها في الكلية .

٨ – متسبش محاضرات

متفوتش المحاضرات عشان المحاضرة اللي هتفوتك هتضطر إنك تدور علي حد من أصحابك حضر المحاضرة عشان يشرحهالك عشان كده متسبش أي محاضرة لو تقدر.

٩ – اتبسط واتفسح

الوقت اللي هتقضية في الكلية هيبقي من أحسن سنين حياتك لازم تتفسح وتتبسط وتخرج وتلف الدنيا عشان هتخلص الكلية هيبقي وراك الجواز ومشاكل الحياة عشان كده اتفسح واخرج واتبسط.

١٠ – لاتصدق التلفزيون

التلفزيون صور الجامعة علي إنها كبارية هتصاحب بنات وتخرج وتعيش حياتك وانت كمان نفسك إنك تلاقي الجامعة كده بس للأسف هيا مش كده ، حتي لو كده ابعد عن السكه ده نصيحة من اخ لأخوة أو اختة.

١١ – انضم إلي الاسرة

هتلاقي عندك في الكلية حاجة أسمها أسرة او ورش الحاجات ده إنضم ليها هتتبسط وتتعرف علي ناس وتطلع رحلات وتعيش جو مختلف هيساعدك الموضوع ده إنك تنبسط في الكلية وتحس إنك بتعمل حاجة مختلفة.

١٢ – لو إنت مغترب

أخر حاجة لو أنت رايح كلية بعيدة عن بلدك هتتعذب شوية أول سنة عشان مش هتبقي عارف أي حد بس هتكون أحلي صداقات وهتعرف ناس من محافظات مختلفة وهتعيش حياة مختلفة في المدينة الجامعية ولو عايز تعرف أكتر عن الحياة في المدينة الجامعية من هنا يارب الموضوع يبقي عجبكم وشدوا حيلكم ومتخافوش ومتخلوش حد يأثر علي قراركم في الكلية اللي هتختاروها.

مواضيع مشابهة

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى